Bħal kull sena, f’Jannar, il-parroċċa tagħna tiċċelebra l-festa liturġika ta’ San Ġiljan. Il-jum propja tal-festa ta’ dan il-Qaddis hija is-27 ta’ Jannar. Pero’ ovvjament, aħna niccelebraw il-festa ewlenija fis-sajf, propju fl-aħħar Ħadd t’Awwissu.
Minkejja li t-temp huwa dejjem riskju, f’Jannar ukoll isiru xi attivitajiet biex ifakkru lil dan il-Qaddis. Din is-sena ma kenitx eċċezzjoni.
Il-Ħamis, 22 ta’Jannar, l-istatwa nħarġet min-nicca. Il-Ġimgħa, 23 ta’Jannar 2015, ġiet iċċelebrata quddiesa fil-kappella dedikata lil San Ġiljan ġewwa Senglea. Mexxa din il-quddiesa Fr Claude Portelli – kappillan. Ta’ min jgħid li l-attendenza għal din il-quddiesa kienet kbira. Wara l-quddiesa, morna ġo restaurant viċin li kien ippakkjat bil-Ġiljaniżi.
It-Tnejn, 26 ta’Jannar, fil-għodu ġiet organiżżata purċissjoni bl-istatwa ż-żgħira ta’ San Ġiljan għat tfal tal-iskola primarja ta’ San Ġiljan. Wara ġiet ċelebrata quddiesa fil-knisja ta’ Lapsi. Il-quddiesa tmexxiet minn Fr Paul Mizzi – Viċi Kappillan. (Ritratt meħud minn: Leħen il-Ġiljaniżi facebook)
It-Tlieta, 27 ta’ Jannar 2015 – Jum il-festa. Fis-sitta nieqes kwart ta’ fil-għaxija, il-qniepen tal-knisja parrokkjali bdew ifakkruna li fis-sitta u nofs kellha tibda l-quddiesa tal-festa. Din tmexxiet mill-kappillan Fr Claude Portelli li kien mgħejjun mill-viċi, Fr Paul. Il-quddiesa kienet animata mis-St Julians Choral Group taħt it-tmexxija ta’ Pio Dalli.
Wara l-quddiesa beda marċ minn ħdejn il-bieb tal-knisja parrokkjali mis-soċjeta’ Banda Spinola mmexxija mis-surmast Aldo Minuti.
Hija ħasra li minkejja l-isforz mill-ftit biex jiġu organiżżati dawn l-attivitajiet, il-konkorrenza tal-Ġiljaniżi kienet fqira. L-attendenza għal-quddiesa tal-festa li saret fil-knisja parrokkjali kienet fqira ħafna. Tgħid fejn kienu dawk li f’Awwissu jgħajjtu Viva Ġiljanu, li jkun jaqbżu mal-marċi, li jiġu jaraw lil-San Ġiljan ħiereġ min-nicca u jċapcu kemm jifilhu ! L-għajta ta’ ‘Viva Ġiljanu’ għandha tkun is-sena kollha billi nimitaw l-eżempji li ħallilna dan il-Qaddis !!
