Qari mill-Ktieb tal-Esodu. 16, 2-4, 12-15.
F’dak iż-żmien: Fid-deżert, il-ġemgħa ta’ wlied Israel bdew igergru kontra Mosè u Aron. Ulied Israel qalulhom: “Mhux li mitna b’id il-Mulej fl-art tal-Eġittu, meta konna ħdejn il-borom tal-laħam u konna nieklu ħobż bix-xaba’! Ħriġtuna f’dan id-deżert biex toqtlu bil-ġuħ din il-ġemgħa kollha!”
Il-Mulej imbagħad qal lil Mosè: “Ara, se nibagħtilkom xita ta’ ħobż mis-sema. Il-poplu kollu joħroġ u jiġbor minnu minn jum għall-ieħor kemm ikun meħtieġ għall-ġurnata, biex hekk inġarrabhom u nara jimxux mal-liġi tiegħi jew le. Jien smajt it-tgergir ta’ wlied Israel. Kellimhom u għidilhom: Filgħaxija tieklu l-laħam u filgħodu tixbgħu bil-ħobż. U tkunu tafu li jiena l-Mulej, Alla tagħkom.”
U ġara li filgħaxija dehret qatgħa summien tittajjar fil-għoli u għattiet it-tined kollha, u filgħodu kien hemm kisja nida madwar it-tined. Meta din il-kisja nida għabet, fuq wiċċ id-deżert kien hemm xi ħaġa rqiqa tħaxwex qisha ġlata fuq l-art. Malli wlied Israel raw dan, bdew jgħidu wieħed lill-ieħor: “Man-hu? Dan x’inhu?” – Għax ma għarfux x’inhu. Mosè qalilhom: “Dan hu l-ikel li l-Mulej takom biex tieklu.”
Salm Responsorjali
Ritornell: Il-Mulej tahom il-qamħ mis-sema.
Dak li smajna u sirna nafu,
U missirijietna ħabbruhulna,
Lin-nisel li ġej inxandruh:
Tifħir il-Mulej u l-qawwa tiegħu,
U l-għeġubijiet li għamel.
Hu kkmanda s-sħab fil-għoli,
U fetaħ bwieb is-sema,
U xita ta’ manna bagħatilhom x’jieklu,
Tahom il-qamħ mis-sema.
Kull wieħed kiel il-ħobż tal-qalbenin,
U ikel bix-xaba’ bagħatilhom.
U daħħalhom fil-post qaddis tiegħu,
Il-muntanja li kisbet il-leminija tiegħu.
Qari mill-Ittra ta’ San Pawl Appostlu lill-Efesin. 4, 17. 20-24.
Ħuti: Jiena dan ngħidilkom u nwissikom quddiem il-Mulej: li ma ġġibux ruħkom skont ma jġibu ruħhom il-pagani bil-bluha ta’ moħħhom.
Intom mhux hekk tgħallimtuh ’il Kristu, jekk għallinqas smajtuh u tgħallimtuh skont is-sewwa li hu f’Ġesù, jiġifieri, li għandkom twarrbu l-ħajja tagħkom ta’ qabel u tinżgħu ’l-bniedem il-qadim, imħassar bix-xewqat tal-pjaċiri qarrieqa, u tiġġeddu fl-ispirtu tal-fehma tagħkom u tilbsu ’l-Bniedem il-Ġdid, maħluq skont Alla, fil-ġustizzja u l-qdusija tassew.
Versett: Hallelujah! Il-Kliem tiegħek, Mulej, huwa spirtu u ħajja; inti għandek il-kliem tal-Ħajja ta’ Dejjem. Hallelujah!
Qari mill-Evanġelju ta’ San Ġwann. 6, 24-35.
F’dak iż-żmien: In-nies, meta ntebhu li fuq id-dgħajsa la kien hemm Ġesù u lanqas id-dixxipli tiegħu, telgħu fuq id-dgħajjes u marru lejn Kafarnahum ifittxu ’l Ġesù. U meta sabuh in-naħa l-oħra tal-baħar, staqsewh: “Rabbi, meta ġejt hawn?”
Ġesù weġibhom u qal: “Fis-sewwa, fis-sewwa ngħidilkom, intom qegħdin tfittxuni, mhux għax rajtu sinjali imma għax kiltu mill-ħobż u xbajtu. Aħdmu, mhux għall-ikel li jgħaddi, iżda għall-ikel li jibqa’ għall-ħajja ta’ dejjem, dak li Bin il-Bniedem se jagħtikom, għaliex lilu Alla l-Missier issiġilla.” Imbagħad staqsewh: “X’għandna nagħmlu biex naħdmu għall-għemejjel ta’ Alla?” Weġibhom Ġesù u qal: “L-għemil ta’ Alla hu dan: li intom temmnu f’dak li bagħat.”
U huma staqsewh: “X’sinjal se turina biex aħna nemmnu fik? X’sejjer tagħmel? Missirijietna kielu l-manna fid-deżert, bħalma hemm miktub: ‘Tahom jieklu ħobż mis-sema’”.
Weġibhom Ġesù: “Fis-sewwa, fis-sewwa ngħidilkom, mhux Mosè takom il-ħobż mis-sema, iżda Missieri jagħtikom il-ħobż tassew mis-sema; għax il-ħobż ta’ Alla hu dak li jinżel mis-sema u jagħti l-ħajja lid-dinja.” “Mulej,” qalulu huma, “agħtina dejjem minn dan il-ħobż”. Weġibhom Ġesù: “Jiena hu l-ħobż tal-ħajja. Min jiġi għandi ma jieħdu qatt il-ġuħ u min jemmen fija ma jkun qatt bil-għatx.”
