In-Nisrani hu mdaħħal fi storja ta’ dnub u ta’ grazzja dejjem bl-alternattiva quddiemu: jew iservi jew jinqeda b’ħutu l-bnedmin l-oħra. Għaldaqstant iż-żewġ identitajiet tan-Nisrani huma l-istorja u s-servizz. L-ewwel l-istorja: San Pawl, San Pietru u l-ewwel dixxipli ma kinux iħabbru lil Ġesù mingħajr l-istorja: huma kienu jħabbru lil Ġesù mwaħħad mal-istorja tal-poplu, il-poplu li Alla ħalla jimxi għal sekli sħaħ qabel ma wasal għall-maturità, għall-milja taż-żminijiet. Alla jidħol fl-istorja u jimxi mal-poplu tiegħu.
In-Nisrani hu bniedem tal-istorja, għax mhux tiegħu innifsu, imma hu parti minn poplu, poplu f’mixja. Ma nistgħux nimmaġinaw egoiżmu Nisrani, dan ma jgħoddx. In-Nisrani mhux raġel jew mara tal-laboratorju spiritwali imma raġel, mara spiritwali li jiffurmaw parti minn poplu li għandu storja twila u għadu għaddej f’mixja sakemm il-Mulej jerġa’ jiġi.
Hija storja ta’ grazzja imma wkoll ta’ dnub. Kemm dnubiet, kemm offiżi. L-istorja tagħna tieħu fuqha qaddisin u midinbin. Hija l-istorja tiegħi personali, ta’ kull wieħed u waħda minna, ilkoll irridu nieħdu responsabbiltà ta’ dnubietna u tal-grazzja tal-Mulej li qiegħda magħna, li takkumpanjana fid-dnub biex taħfer u takkumpanjana wkoll fil-grazzja. Mhemmx identità Nisranija mingħajr storja.
It-tieni karatteristika tal-identità Nisranija huwa s-servizz: Ġesù jaħsel saqajn l-Appostli u jistedinna nagħmlu bħalu: inservu.
L-identità Nisranija hija l-qadi mhux l-egoiżmu. Tgħiduli, lkoll kemm aħna ftit jew wisq egoisti. Minnu. Imma hu dnub, hija drawwa li għandna ninqatgħu minnha. Nitolbu maħfra biex il-Mulej jikkonvertina. Aħna msejħin għall-qadi. Li tkun Nisrani mhix xi ħaġa tad-dieher jew xi atteġġjament soċjali, mhix li tagħmel ftit irtokk f’ruħek ħalli tagħmilha ftit isbaħ. Li tkun Nisrani jfisser li tagħmel dak li għamel Ġesù: isservi.
F’qalbi x’qed nagħmel l-aktar? Irrid lil ħaddieħor jaqdini, ninqeda b’ħaddieħor, bil-komunità, bil-parroċċa, bil-familja tiegħi, bi ħbiebi, jew inservi u nqiegħed is-servizz tiegħi għall-użu tal-oħrajn?
Nawguralkom ilkoll żmien qaddis tal-Għid tal-Mulej, li lkoll inkunu lesti li nimxu fuq il-passi tal-Imgħallem tagħna li qam minn bejn l-Imwiet biex jurina li aħna dixxipli mhux tal-kalvarju biss imma wkoll tal-qabar vojt, li jfisser ħajja ġdida fiĦ.
L-Għid it-Tajjeb lil kulħadd.
Fr Claude
